- آیت   :8  (  تحریکی نقطہ   نظر   سے اہم ) ۔۔۔ عوام الناس  کیلئے   ( آیت: 10  ابتدائی ہدایات )  ۔

ــــ منتخب نصاب: آیات۔8، 10 اور 16

1۔یہاں سَبَّحَ صیغہ ماضی استعمال کیا گیا ہے، اور بعض دوسرے مقامات پر یُسَبِّحُ صیغہ مضارع استعمال ہوا ہے جس میں حال اور مستقبل دونوں کا مفہوم ہے۔ اس کے معنی یہ ہوئے کہ کائنات کا ذرہ ذرہ ہمیشہ اپنے خالق و رب کی پاکی بیان کرتا رہا ہے، آج بھی کر رہا ہے، اور ہمیشہ کرتا رہے گا۔۔۔۔۔عزیز کے معنی ہیں ایسا زبردست اور قادر و قاہر جس کے فیصلے کو نافذ ہونے سے دنیا کی کوئی طاقت روک نہیں سکتی۔۔۔۔اور حکیم کے معنی یہ ہیں کہ وہ جو کچھ بھی کرتا ہے حکمت اور دانائی کے ساتھ کرتا ہے۔ (تفہیم القرآن)

4۔ (غرض یہ کہ وہ ہرطرح اور ہراعتبار سے ہمہ داں، ہمہ بیں ہے) مَا یَلِجُ فِی الْاَرْضِ۔مثلاً بارش کا پانی۔ مَا یَخْرُ جُ مِنْهَا۔ مثلا نباتات۔ مَا یَنْزِلُ مِنَ السَّمَآءِ۔مثلاً ملائکہ اور احکامِ تشریعی اور تکوینی۔ مَا یَعْرُجُ فِیْهَا۔ مثلاً ملائکہ اور اعمالِ صالحہ۔(تفسیر ماجدی)

۔ بالفاظ دیگر وہ محض کلیات ہی کا عالم نہیں ہے بلکہ جْزئیات کا علم بھی رکھتا ہے۔ (تفہیم القرآن)

7۔یہ خطاب غیر مسلموں سے نہیں ہے، بلکہ بعد کی پوری تقریر یہ ظاہر کر رہی ہے کہ مخاطب وہ مسلمان ہیں جو کلمہ اسلام کا اقرار کر کے ایمان لانے والوں کے گروہ میں شامل ہوچکے تھے، مگر ایمان کے تقاضے پورے کرنے اور مومن کا سا طرز عمل اختیار کرنے سے پہلو تہی کر رہے تھے۔ ظاہر ہے کہ غیر مسلموں کو ایمان کی دعوت دینے کے ساتھ ہی فوراً ان سے یہ نہیں کہا جاسکتا کہ جہاد فی سبیل اللہ کے مصارف میں دل کھول کر اپنا حصہ ادا کرو، اور نہ یہ کہا جاسکتا ہے کہ تم میں سے جو فتح سے پہلے جہاد اور انفاق فی سبیل اللہ کرے گا اس کا درجہ ان لوگوں سے بلند تر ہوگا جو بعد میں یہ خدمات انجام دیں گے۔ غیر مسلم کو دعوت ایمان دینے کی صورت میں تو پہلے اس کے سامنے ایمان کے ابتدائی تقاضے پیش کیے جاتے ہیں نہ کہ انتہائی۔ اس لیے فحوائے کلام کے لحاظ سے یہاں اٰمِنُوْا باللہِ وِرَسْوْلِہ کہنے کا مطلب یہ ہے کہ اے وہ لوگو جو ایمان کا دعویٰ کر کے مسلمانوں کے گروہ میں شامل ہوگئے ہو، اللہ اور اس کے رسول کو سچے دل سے مانو اور وہ طرز عمل اختیار کرو جو اخلاص کے ساتھ ایمان لانے والوں کو اختیار کرنا چاہیے۔۔۔۔۔۔۔ اس مقام پر خرچ کرنے سے مراد عام بھلائی کے کاموں میں خرچ کرنا نہیں ہے، بلکہ آیت نمبر 10 کے الفاظ صاف بتا رہے ہیں کہ یہاں اس سے مراد اس جد و جہد کے مصارف میں حصہ لینا ہے جو اس وقت کفر کے مقابلے میں اسلام کو سر بلند کرنے کے لیے رسول اللہ ﷺ کی قیادت میں برپا تھی۔ خاص طور پر دو ضرورتیں اس وقت ایسی تھیں جن کے لیے اسلامی حکومت کو مالی مدد کی سخت حاجت در پیش تھی ایک، جنگی ضروریات۔ دوسرے، ان مظلوم مسلمانوں کو سہارا دینا جو کفار کے ظلم و ستم سے تنگ آ کر عرب کے ہر حصے سے ہجرت کر کے مدینے آئے تھے اور آ رہے تھے۔ (تفہیم القرآن)

8۔ وَ قَدْ اَخَذَ مِیْثَاقَكُمْ ۔ میثاق سے مراد بیعت رسول ؐ بھی سمجھی گئی ہے اور میثاق صلبِ آدمؑ بھی لی گئی ہے۔(تفسیر ماجدی)

۔بعض مفسرین نے اس عہد سے مراد اللہ کی بندگی کا وہ عہد لیا ہے جو ابتدائے آفرینش میں آدم ؑ کی پشت سے ان کی ذریت کو نکال کرلیا گیا تھا۔ اور بعض دوسرے مفسرین نے اس سے مراد وہ عہد لیا ہے جو ہر انسان کی فطرت اور اس کی فطری عقل میں اللہ کی بندگی کے لیے موجود ہے۔ لیکن صحیح بات یہ ہے کہ اس سے مراد اللہ اور اس کے رسول کی اطاعت کا وہ شعوری عہد ہے جو ہر مسلمان ایمان لا کر اپنے رب سے باندھتا ہے۔(تفہیم القرآن)

۔ تمہارا حال یہ ہے کہ رسول، اللہ کی راہ میں انفاق کی دعوت دے رہا ہے اور تم منہ چھپاتے پھر رہے ہو ! تو یہ کس قسم کا عہد اور کس نوع کا ایمان ہے !(تدبرِ قرآن)

9۔  یعنی   رسول  ؐ  تمہیں انفاق   کی دعوت  دے  رہے   ہیں  کہ تمہیں  خواہشات    نفس  اور حب دنیا   کی تاریکیوں  سے نکال  کر  ایمان   اور حب آخرت  کی روشنی  میں لائے ۔(تدبرِ قرآن)

10۔   کمزور  مسلمانوں   کو انفاق   پر   ابھارا  ہے ۔(1 )  آسمان  و زمین  کی تمام  چیزوں  کا مالک اللہ  ہے اور  انسان  کے پاس  جو کچھ  ہے اسکے   خلیفہ  اور  امین کی حیثیت  سے ہے ۔ (2 )  حالات  کے  تغیر   سے اعمال   کی قدر  و قیمت   میں بڑا   فرق  ہوجاتا  ہے  جیسے   فتح  مکہ  سے   پہلے  اور بعد  ( یا آجکل  کے مسلمانوں  کے حالات  میں انفاق   اور  جہاد  دونوں )( تدبر  قرآن)

ــــ  مذکورہ   آیت  کی روشنی  میں علمانے   کتب  اصول  حدیث  میں  یہ صراحت  کی ہے  کہ  " الصحابہ کلھم عدول  " (  سارے  صحابہ   عادل  ہیں )  ۔(انوار  القرآن)

۔ قَبْلَ الْفَتْحِ۔الفتح سے اکثر نے مراد فتح مکہ لی ہے۔۔۔۔۔اور بعض قول صلح حدیبیہ سے متعلق بھی ہیں۔(تفسیر ماجدی)

11۔ انسان  کے پاس   جو کچھ  ہے  وہ اللہ  کی امانت ہے ۔  اپنی امانت    کی واپسی   کو وہ  قرض    ٹھہرا رہا   ہے  اور   گئی  گنا  بڑھا   کر واپسی۔   مضاعفہ   کا ترجمہ   عام طور  پر لوگوں   نے دگنا کرنا کیا   ہے ۔  جو صحیح  نہیں   ۔ ۔۔۔۔ قرض  حسن   کی شرائط   :  (1 )   دل کی   پوری فراخی    اور بلند     حوصلگی   کے ساتھ  نہ کہ دل  کی تنگی  کے ساتھ  (2 )  اچھے  مال میں  سے  (3 )  محض اللہ  کی خوشنودی  کیلئے  (4 )  دیکر احسان  نہ جتانا (5 )   دیکر  دل  آزاری  نہ کرنا (6 )   ریا کاری  نہ ہو (7 )  حلال  مال  سے   (8 )  خود   بھی   اسکی   اشد  ضرورت  ہو ۔ (9 )  پوشیدہ    طور  پردے  ۔(تدبر قرآن)

ــــ  جو  تم  اللہ کی راہ  میں خرچ   کروگے   اس کا بدلہ   دس  سے سات سو   گنا  تک  ملے   گا   بلکہ   اس سے بھی زیادہ  ۔ اسکے علاوہ   اجر  عظیم  بھی۔(ضیاء القرآن)

۔۔۔۔۔حدیث میں حضرت عبداللہ بن مسعود کی روایت ہے کہ جب یہ آیت نازل ہوئی اور حضور کی زبان مبارک سے لوگوں نے اس کو سنا تو حضرت ابو الدحداح انصاری نے عرض کیا یا رسول اللہ، کیا اللہ تعالیٰ ہم سے قرض چاہتا ہے ؟ حضور نے جواب دیا، ہاں، اے ابو الدحداح۔ انہوں نے کہا، ذرا اپنا ہاتھ مجھے دکھایئے۔ آپ نے اپنا ہاتھ ان کی طرف بڑھا دیا۔ انہوں نے آپ کا ہاتھ اپنے ہاتھ میں لے کر کہا " میں نے اپنے رب کو اپنا باغ قرض میں دے دیا۔ حضرت عبداللہ بن مسعود فرماتے ہیں کہ اس باغ میں کھجور کے 600 درخت تھے، اسی میں ان کا گھر تھا، وہیں ان کے بال بچے رہتے تھے۔ رسول اللہ ﷺ سے یہ بات کر کے وہ سیدھے گھر پہنچے اور بیوی کو پکار کر کہا ‘’ دحداح کی ماں، نکل آؤ، میں نے یہ باغ اپنے رب کو قرض دے دیا ہے " وہ بولیں " تم نے نفع کا سودا کیا دحداح کے باپ "، اور اسی وقت اپنا سامان اور اپنے بچے لے کر باغ سے نکل گئیں (ابن ابی حاتم)۔ اس واقعہ سے اندازہ ہوتا ہے کہ مخلص اہل ایمان کا طرز عمل اس وقت کیا تھا، اور اسی سے یہ بات بھی سمجھ میں آسکتی ہے کہ وہ کیسا قرض حسن ہے جسے کئی گنا بڑھا کر واپس دینے اور پھر اوپر سے اجر کریم عطا کرنے کا اللہ تعالیٰ نے وعدہ فرمایا ہے۔(تفہیم القرآن)

ـــــ قرضِ حسنہ کے سلسلہ میں دس ہدایات:۔  قرض حسنہ سے مراد ہر وہ مال ہے جو محض اللہ کی رضا کے لیے اس کی ہدایات و احکام کے مطابق خرچ کیاجائے ۔خواہ وہ فرضی صدقہ یا زکوٰۃ ہو یا واجبی صدقات ہوں یا نفلی ہوں اور خواہ وہ فی سبیل اللہ جہاد میں خرچ کیا جائے یا کسی محتاج کی احتیاج کو دور کرنے کے لیے اسے دیا جائے ۔قرض حسنہ کے سلسلہ میں مندرجہ ذیل دس امور کا لحاظ رکھنا اسے افضل صدقہ بنادیں گے۔(1)حلال کمائی سے خرچ کیا جائے کیونکہ حرام کمائی سے صدقہ قبول نہیں،(2)صدقہ میں ناقص مال نہ دے، (3)اس وقت صدقہ کرے جبکہ خود  بھی اسے احتیاج ہو،(4)اپنی احتیاج پر دوسرے کی احتیاج کو مقدم رکھے،(5)صدقہ چھپا کردینا زیادہ بہتر ہے۔(6)صدقہ دینے کے بعد احسان  نہ جتلائے اور نہ ہی کسی دوسری صورت میں اس کا معاوضہ حاصل کرنے کی کوشش کرے۔یہ باتیں صدقہ کو برباد کردیتی ہیں، (7)صدقہ میں نمود و نمائش یعنی ریا کا شائبہ تک نہ ہو۔یہ بات بھی صدقہ کو برباد کردیتی ہے،(8)اپنے دئیے ہوئے صدقہ کو حقیر جانے ۔صدقہ دے کر اس کا نفس  اس نیکی پر پھول نہ جائے ،(9)اگر صدقہ میں اپنا بہترین اور پسندیدہ مال دے تو یہ اس کے اپنے حق میں بہت بہتر ہے۔(10)محتاج کو صدقہ دینے کے بعد یہ نہ سمجھے کہ میں نے اس پر احسان کیا ہے بلکہ یہ سمجھے کہ میرے مال میں اس کا یہ حق اداکیا ہے اور مستحق کو حق دے کر اپنے سرسے بوجھ ہلکا کیا ہے۔(تیسیر القرآن)

13۔ ۔۔۔اگر تم واپس دنیا میں جاسکتے ہو تو جاؤ اور وہاں یہ روشنی تلاش کرو۔۔۔۔۔واپس اس مقام پر چلے جاؤ جہاں یہ نور تقسیم ہواتھا اور وہاں جاکر اپنے لیے روشنی کی تلاش کرو،اگر کرسکو۔(تیسیر القرآن)

15۔یہاں اس امر کی تصریح ہے کہ آخرت میں منافق کا انجام وہی ہوگا جو کافر کا ہوگا۔ (تفہیم القرآن)

16۔   امام اعمش  ؒ  نے فرمایا   کہ مدینہ   طیبہ   پہنچنے کے بعد  صحابہ    کرام  رضی اللہ تعالی عنہم   کو کچھ   معاشی  سہولتیں  اور آرام  ملا   تو بعض  حضرات  میں عمل   کی  جدوجہد   جو  انکی  عادت تھی   اس میں  کچھ  سستی  اور  کمی  پائی  گئی  اس پر  یہ آیت  نازل  ہوئی  ( روح المعانی)   (معارف  القرآن)

ــــ مرشد تھانویؒ نے فرمایا کہ آیت سے تین باتیں ثابت ہوتی ہیں: ایک خشوع کا لزوم و دوام ۔ دوسرے یہ کہ طولِ غفلت سے قساوتِ قلب پیدا ہوجاتی ہے۔تیسرے یہ کہ قساوت کا علاج ذکر اللہ کی کثرت ہے۔(تھانوی،ج2/ص: 621)(تفسیر ماجدی)

 18۔  مردوں کے ساتھ  عورتوں    کے ذکر   کی اہمیت   -بیوی  بچے   بخل   اور  بزدلی  کے بڑے   اہم عوامل   میں سے  ہیں۔۔۔۔۔۔۔یہاں انفاق کے لیے صدقہ اور قرض کے دو لفظ استعمال ہوئے ہیں۔ پہلا فاعل یا صفت کی شکل میں دوسرا فعل کی صورت میں۔ اس اختلاف کی وجہ میرے نزدیک یہ ہے کہ ایک انفاق تو وہ ہے جس کا مطالبہ ہر ذی استطاعت مسلمان سے عام حالات میں ہے اور جو تزکیہ نفس کے پروگرام کا ایک لازمی حصہ ہے۔ دوسرا وہ انفاق ہے جس کا مطالبہ کسی ناگہانی ضرورت کے موقع پر ملت کے تحفظ کے لیے کیا جاتا ہے۔ پہلے کو یہاں صدقہ کے لفظ سے تعبیر فرمایا ہے اور اس کے لیے فاعل اور صفت کے صیغے استعمال ہوئے ہیں اس لیے کہ وہ دواماً مطلوب ہے۔ دوسرے کو قرض سے تعبیر فرمایا ہے۔ جو عند الضرورت دیا جاتا ہے اس وجہ سے اس کے لیے فعل کا صیغہ استعمال ہوا ہے۔ (تدبرقرآن)

19۔ صدیق کی گواہی کے دومفہوم:۔ایسے ہی صدیق لوگ قیامت کے دن دوسرے لوگوں پر گواہ بنیں گے ۔پھر اس کے بھی دوپہلوہیں۔ایک یہ کہ انہوں نے اپنے قول اور عمل سے نمونہ بن کر سب لوگوں پر واضح کردیا کہ اللہ اور اس کے رسول پر صحیح طورپر ایمان لانے کے یہ اثرات انسان پر مرتب ہوتے ہیں اور دوسرا یہ کہ وہ قیامت کے دن اللہ کے دربار میں یہ گواہی دیں گے کہ ہم نے فلاں فلاں شخص کو دعوت حق دی تھی اور اس کے ردعمل کے طورپر انہوں نے ایسے ایسے جواب دیے تھےاور ہمارے خلاف فلاں فلاں مظالم ڈھائے تھے،بعض مفسرین اس آیت میں واو عاطفہ قرارنہیں دیتے۔ان کے نزدیک یہ دو الگ الگ اور مستقل جملے ہیں۔پہلا جملہ صدِّیقون پر ختم ہوجاتاہے اور والشھداءُ سے دوسرا جملہ شروع ہوتاہے۔ اس صورت میں وہ شہداء سے مراد راہ حق میں شہید ہوجانے والے لیتے ہیں۔میرے خیال میں پہلا مفہوم ربطِ مضمون سے زیادہ مطابقت رکھتاہے۔(تیسیر القرآن)

۔اسلام میں اس وصف کے سب سے نمایاں مصداق حضرت ابوبکر صدیق ؓ ہیں۔ انہوں نے اسے اقرار ایمان کی صداقت، نازک سے نازک زمانے میں، اپنے انفاق سے جس طرح ثابت کی ہے وہ ہماری تاریخ کا سب سے زیادہ روشن باب ہے۔ (تدبرِ قرآن)

۔ اور آیت میں لفظ "هُمُ الصِّدِّیْقُوْنَ" جو کلمہ حصر ہے یہ اس پر دلالت کرتا ہے کہ صدیقیت صحابہ کرام میں منحصر ہے، حضرت مجدد الف ثانی نے فرمایا کہ صحابہ کرام سب کے سب کمالات نبوت کے حامل تھے، جس شخص نے ایک مرتبہ رسول اللہ ﷺ کو ایمان کے ساتھ دیکھ لیا، وہ کمالات نبوت میں مستغرق ہوگیا، واللہ سبحانہ و تعالیٰ اعلم۔ (معارف القرآن)

 20۔ زندگی   کے مختلف  مراحل :    ( 1 )   لعب  ، کھیل  کود (  بچپن )   (2 )  لھو ،عیش  و عشرت ( لڑکپن )   (3 )  زینت  ، کلچر  ۔ خوش  ذوقی  ، خوش   لباسی (  نوجوانی   ،  اٹھتی جوانی )  (4 )  تفاخر   ( بھرپور جوانی )  (5 )  تکاثر مال   و اولاد   کی کثرت  (  ڈھلتی   جوانی  اور  بڑھاپا   -  قبر تک )  (بیان القرآن)

ـــ  دنیوی   زندگی  کے دامن  میں   جو رنگین  کھلونے  ہیں  -   دنیاوی    زندگی عبارت ہے   لہو  و  لعب  سے  جو  بچوں  کا کام  ہے  ،  زینت    و آرائش   جو عورتوں  کا شیوہ ہے   ( یا عورت  نما مردوں کا )  تفاخر   و تکاثر   جس  میں احمق  اور نادان  لوگ   ہی اپنے   آپکو   مشغول  رکھ   سکتے   ہیں ۔ اے  بندہ  مومن  ! تیری  زندگی  بہت  قیمتی  ہے ۔  اسے  ان میں  ضائع  مت کر۔ (ضیا ء القرآن)

21۔  اور مسابقت   کے معنی یہ بھی  ہوسکتے  ہیں  کہ نیک  اعمال  میں  دوسروں  سے  آگے   بڑھنے  کی  کوشش  کرو  جیسا  کہ حضرت   علی رضی اللہ تعالی عنہ   نے اپنی  نصائح  میں فرمایا  کہ  : تم  مسجد  میں سب  سے پہلے   جانے  والے  اور سب  سے آخر   میں نکلنے  والے  بنو   ۔حضرت  عبداللہ  بن مسعود  رضی اللہ تعالی عنہ  نے فرمایا    کہ جہاد   کی صفوف  میں سے  پہلی   صف میں   رہنے   کیلئے   بڑھو    ۔حضرت  انس  رضی اللہ تعالی عنہ   نے فرمایا  کہ باجماعت   نماز  میں پہلی   تکبیر  میں حاضر  رہنے کی  کوشش  کرو ۔۔۔۔۔۔۔۔  جنت  کی تعریف  میں فرمایا  کہ  اس کا عرض  آسمان  و زمین  کے  برابر  ہوگا  ۔  سورۂ  آل عمران  میں لفظ  سمٰوات  جمع  کے ساتھ  آیا  ہے  ۔  ساتوں  آسمانوں   اور زمین  کی وسعت  ایک  جگہ   جمع  کرلو  تو  وہ  جنت  کا عرض   یعنی  چوڑائی  ہوگا ۔ لفظ  عرض  کبھی  مطلق   وسعت  کے معنی  میں بھی   استعمال  ہوتا ہے ۔ (معارف القرآن)

ــــ جنت کی وسعت:۔  یہاں یہ فرمایا کہ جنت کا عرض آسمان اور زمین کے عرض کے برابر ہے اور سورہ آلِ عمران کی آیت نمبر 133 میں فرمایا کہ جنت کا عرض تمام آسمانوں اور زمین کے عرض کے برابر ہے۔حالانکہ ہر آسمان سے دوسرے آسمان تک بھی لاکھوں میل کا فاصلہ ہے۔ اس سے واضح ہوتاہے کہ یہاں جنت کا رقبہ بتانا مقصود نہیں ہے بلکہ یہ الفاظ محاورتاً استعمال ہوئے ہیں اور اس سے مقصود صرف جنت کی وسعت کا تصور دلاناہے۔ جو یہ ہے کہ زمین و آسمان کو تو تم دیکھ ہی رہے ہو جنت ان سب آسمانوں اور زمین سے بھی بڑی ہوگی۔لہذا تم دنیا کے بجائے اسے حاصل کرنے کی کوشش کرو۔ اور اگر تم سچے دل سے اللہ اور اس کے رسول کی اطاعت کروگے تو تمہارے گناہ اور لغزشیں بھی اللہ تعالیٰ معاف فرمادے گا اور اتنی وسیع و عریض جنت بھی عطافرمائے گا۔رہی یہ بات   کہ جس جنت کی وسعت یہاں بیان ہورہی ہے یہ سب اہل جنت کا حق ہوگا، یا ہر جنتی کو اتنی وسیع و عریض جنت ملے گی؟ تو استقصاء سے یہ بات معلوم ہوتی ہے کہ ہر جنتی کی ایک مخصوص رہائش گاہ ہوگی جیساکہ رسول اللہؐ نے معراج کی رات کو جنت میں سیدنا عمرؓ کا محل دیکھا تھا۔سیر و تفریح کے لحاظ سے ہر جنتی اتنی وسیع و عریض جنت میں جہاں چاہے گا جاسکے گا۔اور اس آمد و رفت میں اسے کوئی مشکل حائل نہ ہوگی نہ ہی اسے گاڑیوں یا جہازوں کی ضرورت پیش آئے گی۔(تیسیر القرآن)

22۔" اس کو " کا اشارہ مصیبت کی طرف بھی ہوسکتا ہے، زمین کی طرف بھی، نفس کی طرف بھی، اور فحوائے کلام کے لحاظ سے مخلوقات کی طرف بھی۔۔۔۔۔۔کتاب سے مراد ہے نوشتہ تقدیر۔ (تفہیم القرآن)

24۔ وَ مَنْ یَّتَوَلَّ فَاِنَّ اللّٰهَ هُوَ الْغَنِیُّ الْحَمِیْدُ ۔ یہ اس طرح کے بخیلوں سے نہایت تہدید آمیز الفاظ  میں اظہار بےنیازی و اعلان بیزاری ہے کہ اگر یہ لوگ اس تذکیرو تعلیم کے بعد بھی اعراض ہی کرنے پر تلے ہوئے ہیں تو وہ یاد رکھیں کہ خدا بھی ان سے بالکل بےنیاز ہے۔ (تدبرِ قرآن)

25۔  موجودہ  زمانے  کیلئے  اہم  ترین  آیت  :   ہندوستان  کے ایک  بہت  بڑے   عالم  نے کہا   کہ  ہمیں   انگریز کو تکلیف    نہیں   پہنچا نا   چاہیئے  اس  نے   ہمیں   مذہبی   آزادی    دی  -علامہ  اقبال     :         

              ملا کو جو ہے  ہند  میں سجدے  کی اجازت                          ناداں   یہ سمجھتا  ہے کہ  اسلام  ہے آزاد (بیان  القرآن)

۔۔۔۔۔کِتٰب کے ساتھ ِمیزان کا ذکرمیرے نزدیک کتاب ہی کے سب سے بڑے مقصد کی وضاحت کے لیے ہے کہ وہ تول کر بتاتی ہے کہ کس کے ساتھ کتنا حق ہے اور اس میں کتنا غیر مطلوب اضافہ ہے۔ سورة ٔ شوریٰ میں کتاب الٰہی کے اس پہلو کو نہایت وضاحت سے بیان فرمایا گیا ہے۔۔۔۔۔۔اسی پہلو سے قرآن کو مھیمن بھی کہا گیا ہے۔ مھیمن کے معنی کسوٹی کے ہیں۔ یعنی قرآن ایک کسوٹی ہے جس پر پرکھ کر کھرے اور کھوٹے میں امتیاز کیا جاتا ہے۔ عدل اور قسط کو قائم کرنے کے لیے میزان اور کسوٹی کا ہونا ضروری ہے اس وجہ سے اللہ تعالیٰ نے قرآن کی یہ دونوں صفتیں واضح فرمائی ہیں۔۔۔۔۔۔۔  اس ٹکڑے  میں یہ  چیز  بھی  قابل   توجہ   ہے کہ لفظ    "باس"   مقدم  ہے لفظ   منافع   پر  ۔   جس سے  معلوم  ہوا  کہ اللہ  تعالی  کے نزدیک  لوہے    کی اصل   افادیت  جہاد   کی قوت    فراہم  کرنا  ہے ۔   (اور پھر   لفظ   شدید )    ۔ اس کے دوسرے  تعمیری  اور تمدنی فوائد  مزید  برآں  و ضمنی ہیں۔  (تدبر قرآن)

۔ اس آیت میں کتاب کی طرح میزان کے لئے بھی نازل کرنے کا ذکر فرمایا ہے، کتاب کا آسمان سے نازل ہونا اور فرشتوں کے ذریعہ پیغمبر تک پہنچنا تو معلوم و معروف ہے، میزان کے نازل کرنے کا کیا مطلب ہے اس کے متعلق تفسیر روح المعانی مظہری وغیرہ میں ہے کہ انزال میزان سے مراد ان احکام کا نزول ہے، جو ترازو استعمال کرنے اور انصاف کرنے کے متعلق نازل ہوئے اور قرطبی نے فرمایا کہ دراصل انزال تو کتاب ہی کا ہوا ہے، ترازو کے وضع کرنے اور ایجاد کرنے کو اس کے ساتھ لگا دیا گیا ہے، جیسا کہ عرب کے کلام میں اس کی نظائر موجود ہیں تو گویا مفہوم کلام کا یہ ہے کہ اَنزَلنَا الکِتٰبَ وَ وَضَعنَا المِیزَانِ ”یعنی ہم نے اتاری کتاب اور ایجاد کی ترازو“ اس کی تائید سورة رحمان کی (آیت) (وَ السَّمَآءَ رَفَعَهَا وَ وَضَعَ الْمِیْزَانَ) سے بھی ہوتی ہے کہ اس میں میزان کے ساتھ لفظ وضع استعمال فرمایا ہے۔۔۔۔۔۔۔ عدل  و انصاف   کیلئے   اصل  چیزیں   قرآن   اور میزان  - مگر  سرکش   معاند   جو نہ کسی  دلیل  سے  مانتا   ہے نہ   ترازو   کی تقسیم  کے مطابق   عمل کرنے  کو تیار  ہے  اگر  اسکو آزاد   چھوڑ  دیا جائے    تو  وہ دنیا  میں عدل وانصاف  قائم نہ ہونے   دےگا۔  اس کو پابند   کرنا لوہے   اور تلوار  کا کام ہے ۔   جو  حکومت   و سیاست  کرنے  والے  آخر   میں  بدرجہ   مجبوری  استعمال  کرتے  ہیں ۔۔۔۔۔۔۔اس سے ثابت ہوا کہ خلق خدا کی اصل اصلاح اور ان کا عدل و انصاف پر قائم کرنا درحقیت ذہنوں کی تربیت اور تعلیم سے ہوتا ہے، حکومت کا زور زبردستی دراصل اس کام کے لئے نہیں، بلکہ راستہ سے رکاوٹ دور کرنے کے لئے بدرجہ مجبوری ہے، اصل چیز ذہنوں کی تربیت اور تعلیم و تلقین ہے۔ (معارف القرآن)

۔  اسی  لوہے  سے تلوار  بنتی  ہے  جسکی بابت کہا  گیا  ہے کہ جنت  تلواروں  کے   سائے   میں  ہے ۔ (بخاری ) 

نہ مسجد میں نہ  مندر میں   نہ بیت اللہ کی  دیواروں کے سائے   میں          نماز  عشق  ادا ہوتی ہے  تلواروں  کے سائے  میں(احسن الکلام)

۔فتنہ و فساد کی روک تھام، دین کے غلبہ اور نظامِ عدل کے قیام کے لیے تین چیزوں کی ضرورت :قوانینِ الٰہیہ ،میزان اور قوت نافذہ:۔ دنیا میں فتنہ و فساد کو روکنے کے لیے تین باتوں کی ضرورت ہوتی ہے جو اس آیت میں  بیان کردی گئی ہیں۔ واضح نشانیوں سے مراد ایسے دلائل ہیں جن سے یہ ثابت ہوجائے کہ واقعی یہ رسول برحق اور اس پر نازل شدہ کتاب واقعی اللہ کی طرف سے نازل شدہ ہے اور واضح نشانات بھی اسی کتاب میں مذکور وموجود ہیں۔یعنی اس کتاب میں پر امن زندگی، فتنہ و فساد کی روک تھام اور اللہ کے دین کے غلبہ کے لیے قوانین بیان کیے گئے ہیں۔میزان سے مراد ماپ تول کے پیمانے بھی ہیں۔تاکہ لوگوں کو ان کے حقوق پورے پورے اداکیے جاسکیں اور نظام عدل کو قائم کرنے کے تقاضے اور ہدایات بھی جو کتاب و سنت میں تفصیل سے مذکور ہیں۔اور لوہاسے مراد ڈنڈا یاطاقت اور قوت نافذہ بھی ہے جو عدالتوں کو حاصل ہوتی ہے کیونکہ جو لوگ لاتوں کے بھوت ہوں وہ باتوں سے کبھی نہیں مانتے اور جنگی یا سیاسی قوت اور سامان جنگ بھی جو بالعموم لوہے سے ہی تیار کیا جاتاہے جیسے توپ و تفنگ ،تیر،تلوار، میزائیل، بندوقیں، رائفلیں، اور کلاشنکوفیں وغیرہ ۔تاکہ ان رکاوٹوں کو دورکیا جاسکے جو اسلام کے نفاذ کی راہ میں حائل ہوں۔  ربطِ مضمون کے لحاظ سے لوہا سے مراد اسلحہ اور جنگی قوت  لینا ہی زیادہ مناسب ہے۔یہ تینوں چیزیں ہر رسول کو عطا کی گئیں جو کہ نظامِ عدل کے قیام اور اللہ کے دین کے نفاذ اور فتنہ و فساد کے قلع قمع کے لیے ضروری ہوتی ہیں۔(تیسیر القرآن)

۔ الْبَیِّنٰت کے تحت احکام، ہدایات ،دلائل و معجزات سب آگئے۔(تفسیر ماجدی)

27۔  بعض  حضرات  نے فرمایا  کہ  رأفت   شدت   رحمت  کو کہا  جاتا  ہے  گو یا عام   رحمت   سے   یہ  مبالغہ   کا صیغہ   ہے  ۔  غرض  رأفت  کا تعلق  دفع  مضرت   کے ساتھ  ہے  اور  رحمت   کا  جلب منفعت   سے  ۔ دفع مضرت  مقدم  اس لئے   رأفت   کو   رحمت  سے مقدم  بولا جاتاہے۔(معارف القرآن)

۔  رَهْبَانِیَّة   - مکمل   مضمون  - 326 – 329  (معارف  القرآن)

۔   لا رھبانیۃ  فی الاسلام   ( مسند احمد ) حضور ؐ نے فرمایا   رھبانیۃ ھذہ  الامۃ  الجھاد  فی الاسلام ( مسند احمد )   بخاری و مسلم  کی متفق  علیہ  روایت  - ایک صاحب   نے کہا  میں  ہمیشہ   ساری  رات  نماز پڑھا کروں گا    ، دوسرے نے کہا کہ میں  ہمیشہ   روزہ   رکھوں گا، تیسرے نے کہا کہ کبھی شادی  نہ کروں گا ،  حضور ؐ   نے سنا  اور فرمایا   خدا کی قسم   میں تم سے  زیادہ  اللہ  سے   ڈرتا  اور اس  کا تقویٰ    اختیار   کرتا ہوں مگر میرا طریقہ یہ ہے کہ روزہ رکھتا بھی ہوں اور نہیں بھی رکھتا، راتوں کو نماز بھی پڑھتا ہوں اور سوتا بھی ہوں، اور عورتوں سے نکاح بھی کرتا ہوں۔ جس کو میرا طریقہ پسند نہ ہو اس کا مجھ سے کوئی واسطہ نہیں ۔(تفہیم  القرآن)

۔ رہبانیت  پر  ایک جامع  مضمون  ۔(325 ۔  333)  ۔ (تفہیم القرآن) ۔۔۔رہبانیت : 127 – 131  (ضیا ء القرآن)   رہبانیت  اور عیسائی  اعتقادات  ۔ 231  - 235(  تدبر  قرآن)

ــــ واقعہ  جریج:۔ ایسے ہی ایک راہب ابن جریج کا واقعہ بخاری اور مسلم میں مذکور ہے۔ابن جریج نے جنگل میں کٹیا بنارکھی تھی۔ مامتا ماری ماں اسے ملنے آئی اور اسے پکارا ۔وہ عبادت میں مصروف تھا۔  ماں کی آواز سن کر اور اسے پہچان کر بھی وہ اپنی عبادت میں مصروف رہا اورماں کی پکار کو کوئی اہمیت نہ دی۔ دوسرےدن پھر اس کی ماں آئی۔پھر اس نے کوئی توجہ نہ دی۔تیسرے دن پھر ایسا ہی واقعہ ہوا تو ماں کو اس بات کا اتنا صدمہ ہوا کہ اس کے منہ سے اپنے اس درویش بیٹے کے حق میں بے اختیار یہ بددعا نکل گئی کہ الٰہی جب تک میرا یہ  بیٹا کسی فاحشہ عورت کا منہ نہ دیکھ لے اسے موت نہ آئے۔ دکھیاری ماں کے منہ سے نکلی ہوئی بددعا بھلا رائیگاں کب جاسکتی تھی؟ ابن جریج اپنی عبادت اور خدا ترسی میں اتنا مشہور تھا کہ بنی اسرائیل کے اکثر لوگ اس سے حسد کرنے لگے تھے اور چاہتے تھے کہ ابن جریج پر کوئی ایسا الزام لگے جس سے اس کا  بلند مقام چھن جائے ۔اور اسی مقصد سے خفیہ مشورے بھی ہونے لگے۔ ایک بدنام زمانہ فاحشہ عورت نے ،جو حسن و جمال میں اپنی نظیر نہیں رکھتی تھی،اس خدمت کو سرانجام دینے کا ذمہ لیا اور اسی غرض سے اپنے آپ کو ابن جریج پر پیش کردیا۔ جسے ابن جریج نے رد کردیا۔ اس پر یہ اپنے حسن و جمال پر ناز کرنے والی عورت سیخ پاہوگئی اور اس بے اعتنائی اور ہتک کا انتقام لینے پر اتر آئی ۔اس نے اپنے آپ کو ایک چرواہے پر پیش کیا جس سے اسے حمل ہوگیا۔ جب بچہ پیدا ہوا تو اس نے یہ مشہور کردیا کہ یہ حمل ابن جریج راہب سے ہواتھا۔بس پھر کیا تھا۔ لوگ دوڑ ے آئے اور بلا تامل ابن جریج کو مارنا پیٹنا شروع کردیا اور اس کی کٹیا کو منہدم کردیا۔  ابن جریج نے وجہ پوچھی تو لوگوں نے سارا ماجرا بتادیا ابن جریج کہنے لگے۔ تھوڑی دیر ٹھہرو۔لوگ رک گئے تو اس نے وضو کیا اور عبادت میں مشغول ہوا اور اللہ سے بصد گریہ و زاری اپنی بریت کی دعاکی۔ماں کی بددعا تو قبول ہوہی چکی تھی۔ اب اللہ نے اس پر رحم فرماکر اس کی بھی دعا قبول فرمالی ۔پھر جب وہ لوگوں کے پاس آیا تو وہ فاحشہ عورت بمعہ بچہ وہاں کھڑی تماشا دیکھ رہی تھی۔ابن جریج نے اس بچہ کے پیٹ میں کچوکادے کر پوچھا کہ بتا تیرا باپ کون ہے؟ بچہ قدرت الٰہی سے بول اٹھا:"فلاں چرواہا"تب جاکر لوگوں نے ابن جریج کا پیچھا چھوڑا ۔ ان میں سے بعض اس سے معافی مانگنے لگے اور کہنے لگے: اگر کہو تو تمہیں سونے کی کٹیا بنادیں۔لیکن ابن جریج نے کہا: بس مجھے ویسی ہی مٹی کی کٹیا بنادو۔(مسلم۔ کتاب  البر والصلۃ۔باب تقدیم بر الوالدین)(تیسیر القرآن)

28۔ اس آیت کی تفسیر میں مفسرین کے درمیان اختلاف ہے۔ ایک گروہ کہتا ہے کہ یہاں یٰٓاَیُّھَا الَّذِیْنَ اٰمَنْوْا، کا خطاب ان لوگوں سے ہے جو حضرت عیسیٰ پر ایمان لائے ہوئے تھے۔ ان سے فرمایا جا رہا ہے کہ اب محمد ﷺ پر ایمان لاؤ، تمہیں اس پر دہرا اجر ملے گا، ایک اجر ایمان بر عیسیٰ کا اور دوسرا اجر ایمان بر محمد کا۔ دوسرا گروہ کہتا ہے کہ یہ خطاب محمد ﷺ پر ایمان لانے والوں سے ہے۔ ان سے ارشاد ہو رہا ہے کہ تم محض زبان سے آپ کی نبوت کا اقرار کر کے نہ رہ جاؤ، بلکہ صدق دل سے ایمان لاؤ اور ایمان لانے کا حق ادا کرو۔ اس پر تمہیں دہرا اجر ملے گا۔ ایک اجر کفر سے اسلام کی طرف آنے کا، اور دوسرا اجر اسلام میں اخلاص اختیار کرنے اور اس پر ثابت قدم رہنے کا۔۔۔۔۔۔۔۔ (تفہیم القرآن)